ឃើញបំណែក​យន្តហោះ​មីយ៉ាន់ម៉ាដឹកមនុស្សជាង១០០នាក់​​ ធ្លាក់ក្នុងសមុទ្រ ​

បណ្តា​បំណែក​យន្តហោះ​យោធា​មី​យ៉ា​ន់​ម៉ា (​ភូមា​) មួយ​គ្រឿង​ ដឹក​មនុស្ស​ជាង​១០០​នាក់ ភាគច្រើន​ជា​ភរិយា និង​កូន​ៗ​ជា​សមា​ជិក​គ្រួសារ​កង​ទាហាន ហើយ​បាត់ដាន​កាលពី​រសៀល​ថ្ងៃ​ទី​៧ មិថុនា នោះ ត្រូវ​បាន​រក​ឃើញ​ហើយ​ក្នុង​សមុទ្រ​ប៉ុន្មាន​ម៉ោង ​ក្រោយ​បាត់​ពី​អេ​ក្រង់​រ៉ា​ដា ។

អ្នក​ទទួលខុសត្រូវ​ម្នាក់​របស់​កងទ័ពអាកាស​មី​យ៉ា​ន់​ម៉ា លោក NAING LIN ZAW ថ្លែង​នា​ល្ងាច​ថ្ងៃ​នោះ​ប្រាប់ AFP ថា ពេល​នេះ​គេ​បាន​រក​ឃើញ​ក្នុង​សមុទ្រ​បណ្តា​បំណែក​យន្តហោះ​នៅ​កន្លែង​មួយ​ចម្ងាយ​២១៨​គីឡូម៉ែត្រ ពី​ទីក្រុង DAWEI ភាគ​អាគ្នេយ៍​មី​យ៉ា​ន់​ម៉ា ។
តាម FACEBOOK ប្រមុខ​កងទ័ព​ឧត្តមសេនីយ៍ MIN AUNG HLAING ប្រកាស​មុន​នេះ​បន្តិច​ថា ការ​ទាក់ទង​ស្រាប់តែ​បាត់​ភ្លាម​ៗ​នា​វេលា​ម៉ោង​១៣​និង​៣៥​នាទី ម៉ោង​ក្នុងស្រុក ។ ឧត្តមសេនីយ៍​រូប​នេះ បញ្ជាក់​នា​វេលា​ល្ងាច​ថា មាន​ទាហាន និង​សមាជិកគ្រួសារ​ពួក​គេ​១០៦​នាក់ ព្រមទាំង​សមាជិក​ក្រុម​យានិក​១៤​នាក់ ស្ថិត​ក្នុង​យន្តហោះ​ធុន Y-8F-200 ផលិត​នៅ​ចិន​នោះ ។ មុន​នេះ​បន្តិច​ប្រភព​ព្រ​លាន​យន្តហោះ​រាយការណ៍​ពី​មនុស្ស​១១៦​នាក់​ជិះ​ក្នុង​យន្តហោះ​ជួប​គ្រោះថ្នាក់ ។

ប្រមុខ​កងទ័ព​បន្ត​ថា ប្រតិបត្តិការ​តាម​រុករក និង​ជួយ​សង្គ្រោះ​កំពុង​តែ​ប្រព្រឹត្ត​ទៅ​ជាមួយ​ការ​ជួយ​ទ្រទ្រង់​របស់​បណ្តា​យន្តហោះ និង​នាវា​យោធា ហើយ​គឺ​នាវា​មួយ​គ្រឿងក្នុង​ចំណោម​នាវា​ទាំងនេះ​ដែល​រក​ឃើញ​បំណែក​ទាំងឡាយ ។ការ​បាត់​ការ​ទាក់ទង​ជាមួយ​យន្ត​ហោះ​នេះ ​គឺ​ពេល​វា​ហោះហើរ​លើ​តំបន់ DAWEI ភាគ​អាគ្នេយ៍​មី​យ៉ា​ន់​ម៉ា​ជាប់​សមុទ្រ ANDAMAN ។ យន្តហោះ​នេះ​ហោះ​ចេញពី​ទី​ក្រុង MYEIK ភាគ​ខាងត្បូង​មី​យ៉ា​ន់​ម៉ា ហើយ​ត្រូវ​ទៅ​ចុះ​នៅ​ទីក្រុង​រ៉​ង់​ហ្គូ​ន​អតីត​រដ្ឋធានី​របស់​ប្រទេស ។

តាម​អ្នកនាំពាក្យ​យោធា​ម្នាក់​ថា ២​ភាគ​៣​នៃ​អ្នកដំណើរ​ជានា​រី និង​កុមារ ។ ការ​ហោះហើរ​បែប​នេះ​រៀបចំ​ធ្វើ​២​ដង​ក្នុង​១​ខែ សម្រាប់​ដឹក​គ្រួសារ​យោធា ។ អ្នកនាំពាក្យ​យោធា​បន្ត​ថា យើង​គិត​ថា យន្តហោះ​នេះ​ធ្លាក់​មក​ពី​បញ្ហា​បច្ចេកទេស ព្រោះ​ពេល​មាន​គ្រោះថ្នាក់​ឧតុនិយម​មាន​លក្ខណៈ​ល្អ ។កាលពី​ខែមិថុនា ឆ្នាំ​២០១៦ ឧទ្ធម្ភាគចក្រ​យោធា​មី​យ៉ា​ន់​ម៉ា​មួយ​គ្រឿង​បាន​ធ្លាក់​នៅ​ខេត្ត BAGO ភាគ​កណ្តាល​ប្រទេស​បណ្តាល​ឱ្យ​មនុស្ស​ស្លាប់​៣​នាក់ ។ គ្រោះថ្នាក់​នេះ​គេ​ថា បណ្តាល​មក​ពី​ស្ថានភាព​ឧតុនិយម​អាក្រក់ ។ រួច​កាលពី​ខែកុម្ភៈ ឆ្នាំ​២០១៦ ទាហាន​៥​នាក់​ស្លាប់​ដោយសារ​ការ​ធ្លាក់​យន្តហោះ​យោធា​របស់​ពួក​គេ​នៅ​ជិត​រដ្ឋធានី​ណៃ​ពិដោ ។

គ្រោះថ្នាក់​ក្នុង​ការ​ដឹក​ជញ្ជូន​កើត​មាន​ញឹកញាប់​នៅ​មី​យ៉ា​ន់​ម៉ា ជា​ប្រទេស​បើកចំហ​ទៅ​រក​ពិភពលោក​ចាប់ពី​ឆ្នាំ​២០០១​មក ក្រោយ​ពី​ស្ថិត​នៅ​ឯកោ​ក្រោម​របប​យោធា​រយៈពេល​ច្រើន​ទស​វត្ស ។គ្រោះថ្នាក់​យន្តហោះ​ធ្ងន់ធ្ងរ​លើក​មុន​នៅ​មី​យ៉ា​ន់​ម៉ា កើត​មាន​កាលពី​ថ្ងៃ​ទី​២៨ សីហា ឆ្នាំ​១៩៩៨ ពេល​យន្តហោះ​មួយ​គ្រឿង​នៃ​ក្រុមហ៊ុន​អាកាសចរណ៍ MYANMAR AIRWAYS ជាមួយ​មនុស្ស​ជិះ​៣៩​នាក់ ត្រូវ​បាន​រក​ឃើញក្រោយ​បាត់ដាន​រយៈពេល​៤​ថ្ងៃ ៕

ប្រភព៖ សន្តិភាព